Premiere! "Büttenwarder" mit Jan Fedder un Peter Heinrich Brix kümmt nu op Platt
Hamburg (ots)
Wo an un för sik Platt henhöört, warrt nu ok Platt snackt: In't NDR Fernsehen kaamt Pingstmaandag, den 9. Juni, twee Folgen vun "Büttenwarder" - un dat to'n eersten Maal nich op Hoochdüütsch, man op Platt. De Schauspelers, mit Jan Fedder un Peter Heinrich Brix vöran, hebbt sik in't Studio stellt un de beiden Folgen "Boorgeld lacht" un "Kumm bi de Nacht" noch maal nipp un nau platt nasnackt. Un dor geiht dat üm:
"Boorgeld lacht": In't Naverdörp is de Spoorkass överfullen worrn. Den Spitzboov hebbt se faat kregen, man dat Geld is weg. Dat lett Brakelmann un Adsche keen Roh. Dat Geld mutt jichenswo versteken sien. To nachtslapen Tiet steiht Brakelmann op un will heemlich söken. Un wokeen dröppt he? Sien Fründ Adsche - un halv Büttenwarder. De Freden in't Dörp is futsch, denn Adsche un Brakelmann hebbt jüm all op 'n Kieker. Een vun jüm mutt sik doch dat Geld ünner'n Nagel reten hebben. Dat gifft nix as Stunk un Stank in't Dörp.
"Kumm bi de Nacht": Endlich is de Arv vun'n Naverhoff dor, dat he de Schullen vun sien dootbleven Unkel betahlen kann. Man as Buur Brakelmann un sien Macker Adsche Tönnsen mit ehr Schuldschiens ankaamt, is sien Kass leddig. Aver dat de beiden överhaupt wat vun dat Arvdeel afkriegt, gifft he Brakelmann un Adsche 'n Klappergestell vun Schimmel mit, dat noch in'n Stall steiht. Man för de Arbeit op 'n Acker döggt de Zossen nich. Wenn de in Geschirr de Egg trecken schall, rippt un röögt sik de Stuut nich. För Adsche is de Saak kloor: De Klepper döggt bloots för de Wust. So kriegt se tominst noch 'n poor Mark op 'n Slachthoff ...
Sendetermin: Pingstmaandag, 9. Juni, 18.00 Uhr, NDR Fernsehen
ots-Originaltext: NDR Norddeutscher Rundfunk
Digitale Pressemappe: http://www.presseportal.de/story.htx?firmaid=6561
Rückfragen bitte an:
NDR Pressestelle
Rothenbaumchaussee 132
20149 Hamburg
Telefon:040 / 4156 - 2300
Fax: 040 / 4156 - 2199
Email:
Original-Content von: NDR Norddeutscher Rundfunk, übermittelt durch news aktuell